Harr dat al lang upgeven, wenn ick nich so narsch weer un mien Tallen utwenndig weet. Miene Tallen sünd mi mal in’n Droom infullen un as ick waak wörr, wüß ick se noch. Lüüd de jümmers de sülbige Tallen in’n Kopp hebbt, leevt in Angst un Bang nich bi Tiden den Schien aftogeven. Eenmal harr ick dat wohrhaftig verpaßt, jungedi sünd dat för Qualen, bit de Tallen ruutkaamt. Gottloff, miene weern nich dorbi, so as mehrstiets! Kann ok anners kamen, as nühlichst bi een wietlöfftigen Bekannte. Se harr al lange Johren Lotto speelt un nu endlich düchtig wat wunnen, so sä uns. Den Schien harr se betieden afgeven, alles weer waterdicht. Ehr stünn rosige finanzielle Tokunft bivör un dorup wörr düchtig fiert! De Droom harr sick na twei Dagen utdröömt, as de Naricht keem, dat de Winn noch mit över sößtig anner glückliche Winner deelt warden mütt un so bleevt ünnern Strich nich mehr veel över. Wenn so’n Malöör vörkümmt, mütt man normalerwies dat Lotto spelen upgeven, aber man freit sick je liekers, wenn man mal alle fiev Johr dree richtige hett. Is akraat so as bit Angeln, wenn man keene Wörms an’n Haken maakt, kannst keen Fisch fangen. Bit Lottospelen is dat nich anners. Ohn Insatz keen Winn. Man is
je narrsch un versöökt, dat ümmer wedder!