Up jedeen Zigarettenschachel steiht dütlich, dat Smöken schädlich is. Is je ok woor, wokeen will denn mit ne Teerpapp in de Lung rüm lopen? De Bipackzettel bi Meddikamente maakt mi Angst un Bang. Wenn man den Zettel akraat studeert, kannst sogor to Doot bi kamen.
Männichmal heff ick de Pillen wedder in de Schachel laten. Grundsätzlich heff ick wat dorgegen, wenn mi de Liekenwagen vörtiedigt afhaalt. Man schall je ok nich unsen leeven Gott in de Korten speeln, is je denn een Eingriff in siene Kompetenzen.
Nahstens stünn up de Tafel Schokolor de Henwies, dat bi övermäßigen Jiepern na seute Schokolor mit Fitness nich to reken is, sünner dickt maakt.Wi süht dat denn in‘ Glotzkassen ut, merstendeels Medikamentenwerbung, dor weer ok so’n Bipackzettel nödig. De Dagesschau is je wat för hatte Minschen: Krieg, Terror, Elend un Süken, Flüchtlingsdramen un Korroption. De Blautdruck sticht över dat Verlööfnis. Up jedeen Kanal gifft avends een Tatort odder twei.
So toseggen för bösortige Minschen een Anschauungsunterricht un uns Kinner lehrt nix Gaudes! De Nebenwirkungen seiht wi denn je in unsen Alldag un up’n Schaulhoff. Up den Bipackzettel müß denn stahn: „Nur geeignet für Menschen, die gedanklich etwas ausleben möchten.“
Denn gifft je noch billige Lustigmaker odder oole Kamellen ut Amerika. Hier kunn man ok een gatlichen Henwies bruken. „Dieses Programm ist nur für Menschen mit einem Intellgezquotieten unter 25 % geeignet“.
Kaam noch mal trüüch up de Zigarettenschachel. Dor müß man to lesen kriegen: „Spielen Sie lieber mal Skat, Schach odder Monopoly! Wie wäre es mal mit einem Theaterbesuch?“