Haben Sie Lust auf einen kleinen plattdeutschen Beitrag? Bitte sehr. Sonny Holst, 93 Jahre alt, schreibt in unregelmäßigen Abständen für uns kleine Beiträge zu aktuellen Themen. In diesem geht es um den Sonntagabend, wenn der Kaffeebesuch gegangen ist. Was fängt man an mit der Zeit? Aber lesen Sie selbst.
De Sünndagsavend is dor. De Kaffeebesöök is üm söß na Huus gahn. Nu is Avendbrotstiet. Mütt man överhaupt
wedder wat eten? Steihst in de Köök un överleggst. Schast du di nu n’ Schief Swattbrot smeren?
Dien Fru wull je wegen den Kalorienöverschuß gonnix. Neeschierig kickst mal kott in’t Köhlschapp, ach dor is je noch’n Rest Krabbenslat, oh, un wat rüükt dat fien na Kääs, dree verschieden Sorten. Ne, seggt ick to mi, riet di tosamen, hest je graad vör eeneenhalv Stünnen riev Twetschenkauken eten. Mütt nich sien, büst dick nauch.
Up’n Weg na de gaude Stuuv kümmst an den Wienstänner vorbi. Oh, dor is je noch in een Buddel n’Sluck Dornfelder binnen bleven vun gistern avend. Dat hool ick jümmer so, dormit dat nich heit, dat ick den Wien buddelwies drink, laat jümmers beten wat in. De Gelegenheit is günstig, wiel dat Eten flach follen is, war ick mi an den Rest Rotwien laven. In de Köök ut’n Wienglas drinken is Luxus, dor reckt ook een utspeulte Kaffeedaß, ook wegen den Corpus delicti. Tau schön, so in de Köök twischendörch in stahn een Sluck Rotwien snopen! Wat fang ick mit mi nu an?
Tiet nauch, geihst gau mal ünner de Dusch. Ünner de Dusch maak ick mi girn Gedanken över de taukamen Wuch un wo ick in de verleden Wuch nich taukamen bün. Männichmal schütt mi wat to Kopp, so tum Bispill düsse plattdüütsche Kolumne.
Wenn de Baadstuuvspegel beschleit, denn heit dat, dat ick wedder mal vergeten heff dat Baadstuuvfinster up to maken un tweitens, dat de Duschvörgang sien End hett. Kreislaufmäßig vull up de Hööchte land ich wedder in de Stuuv. Wat liggt an? Bauk lesen? Ne, toeist mal den Glotzkassen ansmieten. Egal wat kümmt un wenn’t noch so dummerhaftig is. In’n Glotzkassen kieken ohn Vörwand, is graad so as ünner de Dusch, dat Programm plöört so vör sick hen.
Wat is dat? Kümmt dor nich wedder so’n lütt Hungergeföhl up? Een Smachter up Knabberkraam? Flink ward ne lütt Schöttel fardig maakt. Drööch kann man je ook nich dorbi sitten, stöövt je sünst so. Wat kümmt letzends dorbi ruut? Maaks ‘n Buddel Rotwien up. Wenn de Tagesschau un de Wederbericht dörch is un narms Sport gifft, ward de Kassen utstellt. Mord un Todslag mütt ick mi nich ankieken, wat je jedeen Dag in Överangebot is. Keen Wunner, dat de Verbreken vun Dag to Dag mehr ward. Kann vörkamen, dat ick mit mien Fru noch’n schönen Spaziergang maak, dor hebbt wi mehr vun. Villicht kehrt wi noch ennerwegens in un dröhnt uns een ut, bit wi bettriep sünd. Tau schön so’n Sünndagsavend!